Emit nanghimakak sa pasangil

CEBU, Philippines - Gihimakak sa kapitan Dorotheo Emit sa barangay Pooc, dakbayan sa Talisay ang report nga ang mga tanod sa ilang barangay migamit og mga motorsiklong inimbargo sa ilang pagpatrolya.

Matud ni Emit   dili kini tinuod kay multicab man lang ang ilang service vehicle sa barangay ug walay mga motorsiklo.

Miingon si Emit nga posibleng kaugalingon sa iyang tanod ang motorsiklo nga gigamit niini sa ilang pagpatrolya.

Si Emit nga nahinabi sa Banat News kagahapon nagkanayon nga sa iyang paglingkod isip kapitan sa Pooc ang iyang kaugalingon Kia Multicab maoy iyang gihimong service sa barangay.

Base sa report nga si Emit kinsa milingkod isip kapitan sa ilang barangay niadtong buwan sa Disyembre sa milabay’ng tuig giingong mipagawas sa na-impound nga motorsiklo ug iya   gipagamit sa iyang mga tanod.

Ang maong motorsiklo giingong gigamit sa pagpanulis sa duha ka mga gidudahang tulisan nga nasikop didto sa Pooc sayo sa milabay’ng tuig.

Gikataho nga ang kapitan kaniadto sa barangay nga si Osmundo Manreal Jr. wala mo-turn-over sa maong motorsiklo ngadto sa kapolisan ug iya kining gibilin   sa barangay hall.

Apan dihang si Emit na ang mipuli isip kapitan giingong gipagamit na ang maong motorsiklo sa mga tanod ug gani giingong nagdagan kini karon nga walay plaka.

Gituohan nga kun ikasumbong si Emit ngadto sa Ombudsman siguradong imbistigahon kini sa maong kalapasan. (BANATNEWS)