CEBU, Philippines - Ang City Prosecutor’s Office mipasaka og kaso batok sa giingong level two drug pusher tungod sa paghupot niini og illegal nga drugas.
Si Prosecutor Noel Cellona mirekomendar og P200 mil nga piyansa kang Jesusimo “Titot” Dequitos, 57, nga taga Villagonzalo II ning dakbayan alang sa iyang temporaryong kagawasan.
Si Cellona miduso sa kasong kalapasan sa Section II Article 2 sa Republic Act 9165 kon Comprehensive Dangerous Drugs Act ngadto sa korte dihang si Dequitos nagdumili na sa pagpresentar sa iyang ebidensya.
Nasayran nga si Dequitos nasikop sa Cebu City Police Office Intelligence Branch nga gipangulohan ni Chief Insp. Romeo Santander pinaagi usab sa search warrant nga giluwatan ni Regional Trial Court Judge Soliver Peras sa Branch 10.
Sa gibuhiang affidavit ni PO2 Adriano Bacatan kini nagbutyag nga ilang gi-implementar ngadto kang Dequitos uban sa mga opisyal sa barangay niadtong kaadlawon sa milabay’ng Oktobre 25, 2011. Dugang pa ni Bacatan nga didto sulod sa balay ni Dequitos nakapunit sila og usa ka sihag nga plastic box nga adunay sulod nga napulo ka medium size nga pakite nga adunay sulod nga gituohang shabu.
Lakip nga nasakmit gikan sa balay sa dinakpan mao ang kwarta nga gituohang halin usab sa gipamaligyang shabu nga nagkantidad og P38,060 ug tulo usab ka cell phone.
Human sa maong operasyon gidala dayon nila si Dequitos ngadto sa ilang buhatan samtang ang gituohang shabu ila usab nga gipasusi didto sa PNP Crime Lab Office.Human kini ma-eksamin nasuta nga positibo kini sa methamphetamine hydrochloride nga mas nailhan nga shabu. (BANATNEWS)