Bag-ong hepe sa OSCA gipaabot

CEBU, Philippines - Gumikan sa protesta nga nahitabo sa duha ka barangay, nalangan ang pagpangita karon sa mahimong bag-ong mangulo sa Office of the Senior Citizens Affairs (OSCA).

Sumala pa ni Jeffrey Ocampo, Executive Assistant of the Mayor nga nadestino sa OSCA, nga adunay nahitabo nga election protest sa Barangay Pahina Central ug Guadalupe nga kasamtangan pa nila karong gisulbad aron mabuhat dayon nila puhon ang eleksyon sa Top 10 nga mahimong nominado nga mangulo sa OSCA .

 Sumala pa ni Ocampo nga dunay mikuwestiyon sa representante sa Pahina Central gumikan kay nahimo lang kini nga leader sa grupo sa senior citizens sulod lang usa ka tuig.

Giklaro hinuon ni Ocampo nga aron mahimong nominado sa Top 10, ang matag kandidato kinahanglan nga sakop sa gi-organisar nga grupo sa senior sulod sa tulo ka tuig ug dili na kinahanglan nga usa ka leader, ang importante nga nahimo kini nga sakop sa grupo.

Samtang sa Guadalupe, dili kwalipikado ang nominado gumikan kay usa kini ka konsehal.

Nanghinaut hinuon ang OSCA nga masulbad kini sa dili madugay ug masaligon si Ocampo nga mahitabo na ang eleksyon sa ikatulong semana sa Nobiyembre. (BANATNEWS)