20 mil ka pasahero midagsa sa SBT

CEBU, Philippines - Gibana-banang mokabat sa kapin 20 mil ka mga pasahero ang midagsa sa South Bus Terminal (SBT) gikan niadtong Domingo sa buntag hangtud kagahapon sa kaadlawon.

Matud ni Carmen Quijano ang operations manager sa CST mibutyag sa Banat News nga kagahapon sa buntag hangtud na sa udto dili na kaayo daghan ang mga pasahero tungod kay nakalarga na kini sa milabay pang adlaw gikan pa niadtong Biyernes sa hapon nga maoy katapusang adlaw sa ting trabaho.

Hinoon napanglantawan ni Quijano nga posibling mosaka og 10 porsyento ang pagdaghan sa mga pasahero nga mamauli gihapon sa ilang tagsa- tagsa ka probinsya karong buntag aron moduaw sa lubong sa ilang minahal sa kinabuhi karong adlawa ug hangtud ugma.

Giklaro ni Quijano nga walay dagkung problema nga ilang nasugatan gawas lang sa napulo ka mga panday nga naimbargohan og mga mahait nga hinagiban sama sa kutsilyo, gabas ug sundang nga gigamit sa ilang trabaho gikan niadtong Biyernes.

Ang naimbargo nga mga butang anaa karon sa mga kamot sa kapolisan apan ang mga tag-iya niini gitugotan nga makapauli sa ilang tagsa -tagsa ka lugar.

Nunot niini gipasalig ni Quijano ang higpit nga siguridad sa nahabiling mga pasahero nga mamauli sa ilang tagsa-tagsa ka probinsya karong Kalag- kalag.

Gipasalig usab ni Quijano nga walay problema sa mga sakyanan tungod kay adunay igong mga biyahe sa mga sakyanan ang kanunay’ng naka-standby sa terminal nga mohakot sa mga pasahero ngadto sa ilang tagsa tagsa ka rota.

Gawas sa mga polis nga gi-deploy sa palibot sa terminal may duha usab ka mga bomb sniffing dogs ang nag-monitor sa mga bagahi pagtino kun wala bay ipalusot nga mga eksplosibo o ba kaha gidiling drugas. (BANATNEWS)