Bangga sa underwater photography himuon sa Sugbo

CEBU, Philippines - Ang lalawigan sa Sugbo mo-alagad sa labing unang Asian Underwater Federation Photography Championships (AUFPC) nga gitakdang ipahigayon sa Nobiyembre 26 hangtod 30 ning tuiga.

Kini maoy nasabotan dihang mibisita sa buhatan sa ni Governor Gwendolyn Garcia ang Secretary General sa Philippine Association on Underwater Activities (PAUA) nga si Benedict Reyes.

Gitug-an ni Reyes ngadto sa gobernador nga gipaabot nila nga may dul-ang usa ka gatos ka mga professional diver ug photographer gikan sa 10 ka mga nasud sa kalibotan lakip na ang Pilipinas ang gitakdang mosalmot sa maong kalihokan.

Matud ni Reyes nga napilian nila ang Sugbo alang sa maong international sports event gumikan sa dili hitopngan ang kaanindot ug ka -adunahan sa kadagatan niini ilabi na sa   ubay-ubay nang mga fish sanctuary nga ania sa kadagatan sa lalawigan. Kini naggumikan sa gipasiugdahan nga programa sa gobernador nga naghatag og protection sa mga isda   sa kadagatan. Pinaagi sa mga kalamboan sa lalawigan, daghan pang mga grupo sa mga propesyonal gikan sa nagkalainlaing dapit sa kalibotan ang nadasig sa pag-anhi sa Sugbo aron masud-ong nilang linawas ang mga kaugmaran dinhi.  - BANAT NEWS