Problema sa tricycle driver wa masulbad

CEBU, Philippines - Wala masulbad ang suliran   bahin sa paghimo sa mga drayber sa traysikol nga parkinganan nila ang ilawom sa flyover sa barangay Tabunok, dakbayan sa Talisay   tungod sa kapakyas sa mga konsehal sa maong dakbayan pagtunga sa miting niadtong Biyernes sa hapon.

Ang bugtong miadto sa maong lugar mao ra si   konsehal Chiy Aznar.

Tumong unta sa maong miting mao ang kabahin sa pagsulbad sa problema sa mga traysikol nga anaa na karon magtapok ilawom sa flyover sa Tabunok.

Kini tungod sa ilang paglikay sa   parking area sa bag-ong merkado sa barangay Lagtang sa katarungan nga walay mosakay kanilang pasahero didto.

Si Tronando Lastimosa ang Vice Chairman sa City Of Talisay Traffic Operation Development Authority (CT-TODA) mibutyag sa Banat News   nga usa sa hinungdan sa kapakyas sa ubang mga opisyal sa dakbayan sa pagtunga sa maong miting   mao ang ilang   opisyal nga   appointment sa maong adlaw.

Gipasabot ni Lastimosa nga kinalit usab ang iyang pagpatawag sa maong miting   busa wala kaayo makahibawo sa sayo pa ang ubang mga opisyal sa dakbayan.

Si Lastimosa nagkanayon nga subli niyang gipahibawo ang mga drayber nga illegal ang ilang pagparking ilawom sa flyover.

Bahin sa pangutana kun buksan pa ba sa kagamhanan ang parking area sa mga traysikol   sa Tabunok, si Lastimosa pintok nga mitubag nga dili na.

Kini tungod matud pa ni Lastimosa kay may ordinansa na ang siyudad n ga kinahanglang adto gyud manukad ang mga traysikol sa parking area sa Lagtang   kun maghatod sila og pasahero gikan sa merkado ug mobalik gyud sila sa pagparking didto inighuman nila og hatud sa pasahero.

Gipasabot ni Lastimosa nga usa sa hinungdan nga giwagtang ang merkado publiko sa Tabunok lakip na ang parking area sa traysikol mao ang paghatag niini og bug-at nga suliran bahin sa trapiko sa maong lugar.

Si Lastimosa midugang nga mopatawag siya og laing miting tali sa mga opisyal sa siyudad ug mga drayber sa traysikol karong liwas na sa Kalag-kalag.   - BANAT NEWS’