Goliat pabayro'g P150 mil sa silingan

CEBU, Philippines - Tungod sa pagpabaya, ang comedian-drama actor nga si Alejandro “Goliat” Nacorda ug ang iyang asawa nga si Liza gimandoan sa korte nga mobayad sa ilang silingan ug P150 mil tungod sa pagkaugdaw sa balay usab niini.

Mao kini ang katapusang hukom sa korte bahin sa kaso nga gisang-at sa magtiayong Medardo ug Jocelyn Delfino batok sa magtiayong Nacorda.

Ang maong kaso nanukad sa pagkasunog sa balay sa sinumbong didto sa dalan Sabellano, barangay Quiot ning dakbayan sa Sugbo niadtong Enero 24, 2007.

Sa maong sunog nahilakip ang balay sa magtiayong Delfino ug lain pang unom ka balay nga pulos silingan sa magtiayong Nacorda.

Ang desisyon nga gipakanaog ni RTC Judge Simeon Dumdum gibase sa mga ebidensya nga nagpakita nga ang sunog nga naggikan sa lawak ni Pluto nga anak sa mga Nacorda naggumikan sa kadanghag.

Matud pa ni Dumdum nga kumo kay namatud-an man nga ang wala malarot nga plug sa plantsang de kuryente   gikan sa outlet niini naggumikan sa pagpabaya sa mga sinumbong, makatarunganon lamang nga mobayad kini sa mga kadaot nga nahiaguman niadtong iyang mga silingan nga napagan sa maong sunog.

Apan wala usab mouyon sa Dumdum sa gipangayo sa mga kihante nga P300 mil aron ikatapak sa katibuk-ang kantidad nga ilang nagasto sa mga materyales sa ilang balay nga nasunog tungod sa kapakyas niini pagpresentar og mga kamatuoran.

Matud pa ni Dumdum mahimong ipaagi lang sa baba ang tanan kay ang korte mangita gyud sa ikapamatuod sa gibasehan sa nangayo sa maong kantidad 

Maoy hinungdan nga gihimo lang ni Judge Dumdom nga P150 mil lang ang pabayran sa pamilyang Nacorda dala na niini ang bayad sa abogado ngadto sa pamilyang Delfino.  - BANAT NEWS