CEBU, Philippines - Magpadayon sa pagpanakop ang mga traffic enforcers sa Traffic Enforcement Agency in Mandaue (TEAM) sa mga traysikol nga nagbaton og mini nga prangkisa bisan sa adlaw sa Todos Los Santos ug Kalag-Kalag.
Si Edwin Ermac, ang executive director sa TEAM mibutyag nga dili mopahulay sa pagpanakop ang mga traffic enforcer sa mga traysikol nga walay business plates nga gipilit sa ilang side cars.
Gitataw niya nga ilang gipakatap sa kadalanan sa dakbayan ang ilang mga sakop nga mga enforcer alang sa paghapsay sa dagan sa mga sakyanan sa kadalanan ingon man pagsikop sa mga pekeng prangkisa.
Ang madakpan isyuhan og Temporary Operators Permit (TOP) nga molungtad lamang og 72 oras ang gihatag nga lugway alang sa ilang pagbayad sa multa nga P6,000 ngadto sa Land Transportation Office (LTO) aron mahibalik ang ilang lisensiya sa pagmaneho.
“This is part of our crackdown against fake and lack of franchise,” ni Ermac pa sa iyang pamahayag.
Sa miaging semana walo ka mga traysikol ug ang drayber nga nagmaneho ilang giisyuhan og citation ticket ug gipabayad og P500 nga multa ug gikuhaan sila sa ilang lisensya.
Ang dakbayan mihatag lang og 2,000 ka prangkisa sa mga traysikol nga makapamasahero sa dakbayan. - BANAT NEWS