Pagbilao mibisita sa Capitol

CEBU, Philippines - Mibisita isip kurtesiya kang Gobernador Gwendolyn Garcia si Gen. Samuel Pagdilao  kinsa maoy national director sa Criminal Investigation and Detection Group (CIDG) sa miaging Biyernes.

Usa sa tuyo ni Pagbilao   mao ang pagpasalamat ngadto sa gobernador tungod sa dakong suporta niining gitunol ngadto sa CIDG7 sa pagpalapad sa ilang operasyon.

Midugang si Pagbilao nga iyang gidayeg pag-ayo ang gobernador gumikan sa gilusad niining gubat batok sa tanang matang sa krimen dinhi sa Sugbo ug sa tibuok rehiyon 7.

Si Pagdilao nagkanayon nga nahisgotan   niya ngadto sa gobernador ang bahin sa katukoran sa   cyber crime laboratory nga itapad   sa Cebu Provincial Police Office sa sitio Sudlon, barangay Lahug ning siyudad sa Sugbo.

Gitug-an usab sa national director sa CIDG nga ang mga kasangkapan ug mga ekipo sa maong laboratoryo nadawat    na sa ilang ulohang buhatan ug gitakdang dal-on unya dinhi sa Sugbo.

Si Governor Gwen Garcia mitumbok nga buot usab siyang matukod dayon ang nahisgutang building aron kasugdan na ang pagpaandar sa   cyber crime laboratory dinhi sa Sugbo aron labing molampos ang kampanya batok sa human trafficking.

Gitataw   sa gobernador nga karong sunod buwan masugdan ang nahisgutang proyekto   kun mapirmahan na ang Memorandum of Agreement (MOA) tali kaniya ug ni Gen. Pagdilao karong Nobiyembre 21 ug isunod ang ground breaking ceremony alang sa maong proyekto. - Chester Abadilla/WC (BANAT NEWS)

Show comments