Ex-Army nga "gun runner" nadakpan

CEBU, Philippines - Gidakop sa kapolisan ang usa ka kanhi sakop sa Philippine Army nga namalit og mga high powered nga armas nga paingon na untang mosakay sa Ro-Ro paingon sa San Isidro, Leyte kagahapon sa alas-5 sa buntag diha sa wharf sa barangay Dunggoan sa dakbayan sa Danao.

Si Ariel Tasic Bolivar, 47, nga taga Mindanao nakuhaan og usa ka Colt 9mm assault rifle, tulo ka .45 nga pistola ug duha ka .357 revolver, ug siyam ka mga magazines.

Si Insp. Romulo Torralba, deputy for operation sa Danao City Police Station nga maoy nangulo pagsikop kang Bolivar nagkanayon nga nakadawat sila og impormasyon nga dunay tawong namalit og armas nga dad-on sa Mindanao ug mosakay kini og barko paingon sa San Isidro, Leyte .

Ilaha kining giatngan sa wharf ug sa dihang mihaom ang deskripsyon sa ilang impormante ilahang gisita si Bolivar nga nagdala og karton niadtong higayona nga paingon nang mosaka sa barko.

Matud ni Torralba sa dihang ilang gisusi ang sulod sa karton niini nasuta nga pulos armas nga giputos og papel ang sulod niini ug napakyas kini pagpakita og mga papeles sa pagdala niini.

“Dayon na niyang saka sa barko, mura gud siya og nakuyawan nga among gipangitaan papeles, wa ka tingog,” dugang sab ni Torralba.

Sa ilang pagsukitsukit giingong mitug-an si Bolivar kanila nga ikaduha na niya kining higayon nga nangompra og armas diha sa Danao.

Matud ni Torralba nga mitug-an usab kanila si Bolivar nga kanhi siya sakop sa Philippine Army kaniadto apan nataktak tungod sa absence without official leave (Awol) niadtong 1980.

Si Sr. Supt. Patrocinio Comendador, hepe sa kapulisan sa probinsya sa Sugbu nagkanayon nga ang maong armas dad-on ni Bolivar didto sa Mindanao ug diha lang iagi sa San Isidro, Leyte ug mag land trip nalang paingon sa Surigao del Norte.

Hinuon iyang giklaro ang maong mga armas walay koneksyon sa kasaulogan sa Kalag-kalag kundili gamiton kini sa mga kriminal didto o kaha gamiton sa pagpanulis.

Nagtuo si Comendador nga usa ka gun runner si Bolivar ug iya usab kining ibaligya ang maong mga armas didto sa Mindanao.

“I do believe magamit ni sa mga kriminal ug ibaligya ni didto, gun runner gyud ni siya (Bolivar),” matud pang Comendador.

Si Comendador mibana-bana nga dul-an sa P50 mil ang kantidad sa maong mga armas. Gitinguha sa kapulisan sa Danao nga ilahang mapasaka ang kaso sa piskaliya didto sa Danao kagahapon sa hapon batok kang Bolivar.

Si Bolivar sa dihang gisuwayan unta pagkuha sa iyang reaksyon, apan wala na gyud kini motubag bisan usa nalang ka pangutana sa mga sakop sa media diha sa provincial headquarters. (BANATNEWS)