500 sundawo motabang sa PNP
CEBU, Philippines - Dul-an sa 500 ka mga sundawo ang moabag sa kapulisan pagpatunhay sa kahusay ug kalinaw atol sa kasaulogan sa adlaw sa mga Santos ug mga patay karung sunod semana.
Si Lt. Col. Christopher Tampus, tigpamaba sa Armed Forces of the Philippines (AFP) Central Command nga nahinabi sa mga tigbalita nagkanayon nga mosuporta sila sa Philippine National Police (PNP) ubos usab sa request sa kadagkuan sa Police Regional Office-7.
Matud ni Tampus nga ang mga sundalo ipakatap sa amihanan ug habagatang Sugbu aron motabang sa pagbantay.
Duha usab ka squad sa 78th IB ang gi-deploy sa Cebu City Police Office (CCPO) nga maoy motabang sa kapulisan pagbantay diha sa mga dagkong sam-ang dinhi sa dakbayan sa Sugbu.
Dugang pa ni Tampus nga lakip sa higpitan nila pagbantay ang Negros ug lalawigan sa Samar tungod sa presensya sa mga rebeldeng New Peoples Army nga posibleng motisok og kagubot.
Ang Central Command gibutang sa “blue alert” karung panahona. (BANAT NEWS)
- Latest
- Trending
