'Bigtime pusher' sa Ermita nakaipsot

CEBU, Philippines -  Nakaeskapo ang usa ka gipasanginlang bigtime drug pusher sa mga kamot sa nangrondang mga sakop sa City Intelligence Branch (CIB) sa Cebu City Police Office (CCPO) kagahapon sa alas-2 sa kaadlawon diha sa panimalay niini sa Ermita Proper, barangay Ermita siyudad sa Sugbu.

Sigun sa taho nakabantay si Nilo Aban sa pag-abot sa grupo ni Sr. Insp. Chuck Maghanoy sa CIB ug daling miikyas.

Armado ang kapulisan og search warrant nga giisyu ni Executive Judge Soliver Peras sa Regional Trial Court (RTC) branch 10 subay sa kalapasan sa Section 11 Art 2 sa Republic Act (RA) 9165.

Apan bisan kini nakaeskapo nakakuha ang kapolisan og usa ka bulto, laing usa ka medium pack, ug napulo ka gagmay nga pakete nga gituohang ang sulod pulos shabu nga gibanabanang moabot dul-an P50 mil.

Laing nakuha sa kapulisan ang lima ka units sa moli-moli machines functional nga may logo “LT.”

Nasayran ang kapulisan ug ang Philippine Drug Enforcement Agency (PDEA) Central Visayas mipahugot karun sa ilang kampanya batok sa ginadiling matang sa drogas gumikan sa nagsingabot nga kasaulogan sa adlaw sa mga Santos ug sa mga patay karung Nobiyembre 1 ug 2.

Gipaabot nga motaas ang demand sa shabu karung panahona tungod sa maong okasyon.

Bisan tuod kun nakaikyas si Aban pasakaan gihapon kini og kaso subay sa mga ebidensyang nakuha nga kasamtangan karung giduso sa PNP Crime Laboratory alang sa eksaminasyon.

Niadtong Martes sa kaadlawon unang gironda sa CIB ang panimalay sa laing bigtime drug pusher diha sa Back Blessed Sacrament, Villagonzalo 2 sa barangay Tejero nga miresulta sa pagkasikop ni Jesus Dequitos, 57, alyas Titot kinsa gipasakaan na og kaso sa kapulisan. (BANAT NEWS)