Way kudeta-CENTCOM

CEBU, Philippines - Gihimakak sa tigpamaba sa Central Command nga si Lt. Col. Christopher Tampus ang mga nanggawas nga huhungihong nga adunay nag-umidong mahitabong kudeta nunot sa pagka-diskontento sa kasundaluhan sa pagtagad ni Presidente Benigno Aquino III sa nahitabo sa Basilan.

Si Tampus miingon nga ang kasundalohan “101 percent” ang suporta sa kasamtangang pangulo ug ilaha gihapong gisunod ang chain of command.

Alang kang Tampus nga bisan tuod og nagdugo pa hangtud karun ang ilang mga kasing-kasing tungod sa gidangatan sa ilang mga kaubang sundawo didto sa Basilan ug Zamboanga mas gisuportahan nila ang sabot-kalinaw.

Niadtong milabay’ng semana hangtud ning mga panahona mokabat na sa dul-an 40 ka sundalo ug mga sibilyan ang nakalas samtang liboang mga sibilyan ang namiya sa ilang mga lugar sa Basilan ug Zamboanga-Sibugay tungod sa nagsunod nga engkwentro tali sa Moro Islamic Liberation Front ug ang mga giingong lost command niini nga mga sakop. (BANAT NEWS)