CEBU, Philippines - Nakahukom si PRO-7 Chief Supt. Marcelo Garbo nga iya nalang bawion ang mga solicitation letter nga iya nang gihatag ngadto sa iyang mga higala human migawas ang report kagahapon sa lokal nga mga pamantalaan dinhi sa Sugbo.
Ang solicitation letter adunay kantidad nga mahimong pilian sa gustong mo-sponsor sa iyang planong pagtukod og usa ka golf course diha sa dakbayan sa Lapulapu ug ingon man pagtukod og barracks didto sa lungsod sa Sibonga alang sa mga police recruit nga kasamtangang gipaubos og training sa Regional Public Safety Batallion (RPSB).
Si Garbo mipasabot sa iyang tumong nganong nag -solicit siya ngadto sa iyang mga higala nga naglakip sa mga politiko tungod sa iyang programa nga gusto niyang ipatuman kay nasayud siyang kuwang kaayo og resources ang gobiyerno nga ikahatag ngadto sa PNP organization.
Matud ni Garbo nga mahimong makatigom siya og P1 milyon sa solicitation apan tungod sa migawas nga report kagahapon daw nasagmuyo siya nga unta alang raman kini sa kaayohan sa tanan niyang mga sakop. Iyang gipaniguro nga ang kantidad gikan sa mga solicitation letter dili kini mapunta sa iyang kaugalingong bulsa.
Si Garbo mimando nalang sa iyang giumol nga command group nga bawion ang mga nahatagan sa solicitation letter ug tun-an pag-ayo kun aduna ba silay angayan nga usbon nga dili na isipon ngil-ad sa publiko.
May mga report nga nanggawas nga matud pa, ireklamo ang ubang opisyal tungod kuno kay lakip usab sila ang gihatagan sa solicitation letter sa ilang labaw.
Sa maong report ang National Police Commission (Napolcom) mibahad nga mag-atubang og kaso si Garbo kun iya gyung ipamugos sa iyang mga sakop ang solicitation letter aron lang makatigom og pundo alang sa iyang mga programang ipatuman sa higayong adunay moreklamong opisyal.
Apan si Sr. Supt. Patrocinio Comendador, hepe sa kapolisan sa probinsya sa Sugbo mikompirmar sa mga tigbalita nga nakadawat siya sa maong solicitation letter.
Apan sa tan-aw ni Comendador wala siyay nakitang problema sa solicitation kay alang ra sab kini sa kaayohan sa mga kapolisan dinhi sa rehiyon. - BANAT NEWS