PDEA hataga'g 20 ka K-9

CEBU, Philippines - Giangkon sa bag-ong regional director sa Philippine Drug Enforcement Agency (PDEA)-7 nga si Governor Gwendolyn Garcia buot nga makabaton ang ilang buhatan og dili mominus sa 20 ka mga K9 dogs nga maoy magamit sa mga otoridad sa pag-ila sa mga kontrabando ilabi na ang illegal nga drugas nga ipasulod dinhi sa Sugbo.

Sigun pa ni PDEA-7 Regional Director, Jigger Montallana nga ang maong gidaghanon sa mga K9 dogs nabungat sa gobernadora atol sa iyang pag-courtesy call niadtong adlaw nga Lunes didto sa buhatan sa gobernador human masayri sa gobernadora nga ang Cebu maoy sentro sa transhipment sa sindikato sa ilegal nga drugas sa tibuok         nasud.

Si Montallana miingon nga ang gobernadora mitanyag nga ang kagamhanan sa lalawigan sa Sugbo andam nga motabang sa ilang buhatan nga makabaton sa maong gidaghanon sa mga K9 dogs.

Gihulagway ni Montallana nga kun matuman ang maong plano ang kagamhanan sa lalawigan mas molabaw pa unya sa national government sanglit ang K9 dogs sa ulohan nga buhatan sa PDEA wala man makaabot og 20.

Apan giklaro ni Montallana nga ila pang gi-estudyohan pag-ayo ang maong proposal sanglit magkinahanglan man kini og dakong pundo alang sa pag-train ug pag-atiman sa mga K9 dogs nga magamit sa operation sa   PDEA-7.

Dugang pa niya nga daling madeskitahan ang mga kontrabando sa illegal nga drugas sa higayon nga ipasulod na kini sa Mactan Airport ug sa pantalan dinhi sa Sugbo kun may mga K9 dogs. - BANAT NEWS