Naigo sa bala sa tanod angol

CEBU, Philippines -  Tulo ka tawo ang naangol human kini maigo sa saag nga bala ug napusilan pagtuyo sa nagkalainlaing dapit ning lalawigan sa Sugbo kagahapon ug sa miaging Lunes.

Ang mga biktima mao sila si Charlie Estenzo Duran, 24, ulitawo ug drayber sa habal-habal sa barangay Cabungahan, lungsod sa Catmon; Jefferson Devera, 20, dispatser nga taga barangay Buhisan, dakbayan sa Sugbo ug Bryan Cabucayan, 23 nga silingan ni Devera sa Buhisan.

Sumala sa kapolisan   nga si Duran nalasikan sa usa ka saag nga bala gikan sa armas de fuego ni Benito Suday, 54, biyudo ug hepe sa tanod sa Cabungahan.

Kini samtang nagduwa og basketball si Duran unya si Suday kinsa nagtan-aw sa maong duwa nakalitan dihang natagak ang iyang armas sa sementadong korte sa basketbolan ug sa pagboto niini didto malasik ang usa ka bala sa liog ni Duran.

Si Suday mikagulkol na karon sa prisohan. 

Samtang si Devera gipusil    sa iyang kontra nga giila sa kapolisan nga si Berto Tampus   nga taga Buhisan.

Kini samtang naglakaw si Devera   pauli sa ilang balay ug dihang nasugatan niya ang suspetsado kalit siyang gipusil niini ug maayo nalang kay gitiil siya pag-igo, dayon misibat   ang suspetsado.

Si Cabucayan gipusil sa wala hiilhing kriminal dihang misuway siya pagkatkat sa bintana sa usa ka silingan nilang balay nga walay tawo ug maayo nalang kay tiil ra gihapon niya ang nasabak.

Ang mga biktima anaa pa sa mga tambalanan karon. Uban sa report ni Nica Vencelao PIT Intern/WC (BANAT NEWS)