Mga Muslim sa Sugbo mikondenar sa pagpangatake

CEBU, Philippines -  Gikondenar sa Muslim community dinhi sa Rehiyon 7 ang mga kalihukan sa mga sakop sa rebelde didto sa Mindanao kung diin ubay-ubay na nga sundalo ug sibilyan ang namatay ug nangaangol.

Nasayran nga nagsunod-sunod nga panag-engkwentro karon tali sa mga rebelde ug militar sa Basilan, Zamboanga-Sibugay ug Lanao del Norte tunga-tunga niining umaabot nga peacetalks sa gobiyerno ug sa Moro Islamic Liberation Front. Giklaro hinuon sa militar nga ang ilang gigukod mao ang mga lost command nga MILF apan sa insidente sa Al Barka, Basilan ang mga MILF ang giingong mi-ambush sa mga sundalo nga mikalas og 19.

Gipadayag sa director sa Commission on Muslim Filipinos (NCMF-7) nga si Malo Manonggiring nga ang mga binuhatan sa mga rebelde wala masubay sa pagtulun-an sa Islam.

Gisuportahan usab niya ang mga desisyon ni Presidente Noynoy Aquino kinsa misalikway sa mga panawagang all-out war batok sa MILF ug suspensuhon ang ceasefire aron lutuson ang namanhig sa mga sundalo.

Si Manonggiring mibutyag nga katungod sa militar isip magbalantay sa kagawasan ug kalinaw sa nasud ang paglusad niini og air strike sa mga rebelde.

Samtang usa ka sakop sa Muslim community dinhi sa Sugbo nga si Frelia Murasit ang misaysay sa Banat News nga uyon siyang pakgangon ang mga rebelde aron magmalinawon na ang tibuok nasud.

Sumala pa ni Murasit nga wala siya’y nakitang kaayohan sa tumong sa mga rebelde nga kung buot huna-hunaon gibuhat man sa gobiyerno ang patas nga pagtratar sa publiko. (BANAT NEWS)