CEBU, Philippines - Ugmang adlawa (Huwebes) mopakatap na og mga sakop ang Theft and Robbery Section (TRS) sa Cebu City Police Office (CCPO) ug mga sakop sa Barangay Peacekeeping Action Team (BPAT) sa mga lugar dinhi sa dakbayan agi’g pagpangandam sa kasaulogan sa Kalag-kalag sunod semana.
Si Insp. Rolando Pinili, hepe sa TRS nga nahinabi sa mga tigbalita nagkanayon nga hasta ang barangay gikinahanglang motabang sa seguridad ilabi na pagbantay batok sa mga kawatan tungod sa kataas sa bakasyon. Partikular sa gibantayan mao ang grupo sa acetylene gang nga ang mga target mao ang mga pawnshops ug mga bangko.
Niadtong Sabado, unom ka mga gidudahang sakop sa Waray-Waray Group nga taga Tacloban City ang ilang gidakop sa usa ka mall sa downtown area. Apan tungod kay walay ebidensyang nakuha gikan kanila bagransya lang nga kaso ang nasang-at batok kanila.
Samtang lakip sa bantayan mao ang mga ATM machines nga maoy dangpanan sa mga tawo tungod kay walay abling bangko panahon sa taas nga bakasyon nga magsugod karong Sabado hangtud sa adlaw’ng Martes.
Aduna say mo-roving nga mga polis sa nagkadaiyang subdivisions ug residential areas ingon man karong Biyernes nga maoy adlaw sa tingdeposito og kwarta sa bangko. (BANAT NEWS)