37 angol sa bus

CEBU, Philippines -  Mikabat ngadto sa 37 ka mga tawo ang naangol human ang usa ka Auto Bus nga ilang gisakyan midaro ngadto sa sementadong koral sa usa ka beach resort kagahapon sa kaadlawon diha sa National Highway sa barangay Binongkalan, lungsod sa Catmon.          

Ang drayber sa nahisgutang bus nga pasaheroan mao si Joseph Rababon Mahinay, 39, taga sitio Mangcao, barangay Anapog, lungsod sa San Remegio temporaryong nadetiner sa Catmon Police Station.

Si SPO1 Januario Sudaria, assistant traffic investigator sa pakighinabi sa Banat News kagahapon mibutyag nga ang maong bus gikan sa lungsod sa Sogod paingon unta sa dakbayan sa Sugbo.

Sa wala pa mahitabo ang aksidente, ang bus nagdulhog nga nagsubay sa kurbahon nga karsada apan kalit lang kining misimang sa tuong bahin ug midaro sa koral sa Rañola Beach Resort nga maoy hinungdan sa pagkaangol sa mga pasahero.

Hinuon matud ni Sudaria nga slighty injured lang sama sa bun-og ug garas sa ilang kalawasan ang naangkon sa mga pasahero.

Si Sudaria wala mohatag og dugang pamahayag sa hinungdan sa pagsimang sa bus sanglit nagpadayon pa ang imbestigasyon sa aksidente.

Midugang kini nga gisubay pa usab sa iyang kauban ang mga naangol diha sa mga duol nga tambalanan.(EIM) (BANAT NEWS)