Ulitawo girakrakan patay

CEBU, Philippines - Patay diha-diha ang usa ka 32-anyos nga ulitawo human kini gibabagan sa karsada ug girakrakan sa usa ka wala mailhing lalaki diha sa highway sa barangay Tomonoy sa lungsod sa Moalboal niadtong Domingo sa alas 7:30 sa gabii.

Ang biktima mao si Dennis Calledo, 32, ug nagpuyo sa maong lugar samtang padayon pang nangita ang kapolisan og lead alang sa pag-ila sa lalaking mibanhig sa biktima.

Matud ni PO2 Camelo Zapra sa Sibonga Police Station dihang nahinabi sa Banat News subay sa imbestigasyon sa kapolisan ang biktima nagmaneho sa iyang motorsiklo paingon sa lungsod apan pag-abot sa maong lugar gibabagan kini taliwa sa dalan sa usa ka lalaki.

Dihang mihunong ang biktima kalit kining gipaulanan og bala ug naigo sa lain laing bahin sa lawas gamit ang wala matinong kalibre sa armas hinungdan sa pagkahagba niini ug namatay diha-diha. Gidudahan nga may kalambigitan sa bisyo sa ginadiling drugas ang krimen ug karon maoy gisubay sa kapulisan sa ilang imbestigasyon. (FREEMAN)