2 gipusposan ug gipusil

CEBU, Philippines - Nabinlan nalang og gamay’ng kinabuhi ang duha ka tawo kinsa gipusposan og botelya ug   gipusil, dayon gikulata   sa grupo sa mga batan-on nga wala hiilhi didto sa sitio Manggahan, barangay Punta Princesa ning dakbayan sa Sugbo sa miaging gabii.

Ang mga biktima mao sila si Wenillo Caitor, 28, molupyo sa maong lugar kinsa usa ka aircon technician ug Leonado Gabiana, hingkod, nga taga sitio Tipon sa maong barangay.

Sumala sa kapolisan nga gikan si Caitor nga mibilar sa haya sa ilang silingan sa usa ka kapilya nga dili kaayo halayo sa ilang balay.

Dihang mipauli siya sa hapit nang tungang gabii, naagian niya ang grupo sa 12 ka tawo nga nag-inom sa daplin sa karsada.

Apan sa walay igong hinungdan usa sa maong grupo ang mipunit og basiyo sa bino ug gipuspos sa agtang sa biktima hinungdan nga kini nakuyapan ug   nahagba sa yuta.

Si Gabiana nga nakakita sa maong hitabo milihok aron sakwaton ang biktima dihang laing kauban sa grupo ang milanit sa gitangkil nga armas niini ug giluthang si Gabiana.

Maayo nalang kay siko ra sa biktima ang naigo sa usa ka bala sa armas nga wala masuta ang kalibre.

Ang mga kriminal kinsa nabalaka nga mapatay nila si Gabiana nakahukom sa pagkulata nalang niini ug dihang nalup-og na si Gabiana   sa yuta tapad kang Caitor, mikaratel og dagan ang grupo sa namaregla kanila ug gibiyaan ang duha ka biktima.

Mga silingan na maoy naghatod sa mga biktima ngadto sa Cebu City Medical Center. Padayon pang gipangita sa kapolisan ang mga miparegla kanila. (WC) (BANATNEWS)