CEBU, Philippines - Patay ang usa ka 3-anyos nga batang babaye human pusila samtang natulog sulod sa kwarto sa ilang pinuy-anan sa bukirang bahin sa barangay Magcagong sa lungsod sa Sibonga niadtong Domingo sa alas 9:30 sa gabii.
Ang biktima mao si Dove Sarsona, 3, nagpuyo sa nahisgutang lugar hinuon natumbok dayon ang responsable sa maong krimen nga si Marlo Dela Rosa, 24, molupyo sa maong barangay.
Si Dela Rosa giingong igsuon sa mieskapong piniriso sa Cebu Provincial Detention and Rehabilitation Center (CPDRC) nga si Renante Dela Rosa niadtong milabay’ng semana kinsa mitahan og balik pagka-Sabado.
Matud ni PO1 Jose Palmero sa Sibonga Police dihang nahinabi sa Banat News subay sa imbestigasyon, ang biktima sa wala pa ang hitabo gipakatulog sa inahan nga si Marialyn Sarsona ug gimosketirohan kini ug pagkahuman gibiyaan ug nibalik sa ilang tindahan sa gawas sa ilang balay.
Samtang nalingaw nga nagtabi si Marialyn kauban sa iyang inahan diha sa ilang tindahan kalit lang mipaka ang buto sa armas sa gawas nga bahin ug dangtan og pipila ka gutlo nakit-an nila ang suspek nga nagdagan paingon sa ngitngit nga lugar dayung tungas sa bukid.
Dihang gisusi ni Marialyn ang iyang anak sa kwarto nakit-an niini nga nagkadugo na kini hinungdan nga nangayo dayun ug pakitabang sa mga polis.
Ang patrol car na sa mga polis nga mirespondi maoy gikargahan sa biktima nga daling gihatud sa Deiparine Medical Clinic sa lungsod apan daling girekomendar sa mga doktor nga ipalahos sa tambalanan dinhi sa dakbayan sa Sugbo tungod kay delikado na ang kahimtang.
Apan gideklarar nga dead on arrival ang biktima sa pag-abot sa Vicente Sotto Memorial Medical Center (VSMMC).
Ang kapulisan milusad dayon og hot pursuit operation nga miresulta sa pagkasikop sa suspek sa pinuy-anan sa uyoan niini sa mao gihapong lugar ug kasamtangan karung gikostudiya samtang padayon pa ang imbestigasyon.
Ang suspek gikatakdang ipaubos sa paraffin test tungod kay walay armas nga nakuha gikan kaniya ug wala pa usab motingog sa hitabo dihang gisukit-sukit sa kapulisan.
Sumala pa sa report sa Balitang Bisdak kagahapon ang apohan sa bata mibutyag nga posibleng ang pagpusil sa iyang apo may kalambigitan sa kaso sa maguwang sa suspek nga diin usa ang ilang kabanay sa testigo sa kasong pagpatay batok niini. (EIM) (BANATNEWS)