Lolo gilatigo'g kahoy sa apo

CEBU, Philippines - Nabalian og mga bukog ang usa ka apohan human kini latigoha og kahoy sa iyang apo sulod sa balay didto sa sitio Cambugolan, barangay Poblacion, lungsod sa Ginatilan niadtong Biyernes sa gabii.

Ang biktima mao si Pedro Dagandan, 59, samtang ang suspetsado mao ang iyang apo nga si Reymark Dagandan, 18, nagtungha isip third year sa high school sa maong lungsod.

Sumala sa kapolisan sa Ginatilan, nga misumbong kanila si Cesaria Dagandan, asawa sa biktima kalabot sa pagpanghagis sa suspek sulod sa ilang balay niadtong Biyernes sa alas 9:00 sa gabii.

Matud pa sa maong apohang babaye nga miabot ang suspetsado nga hubog ug nagpunay og yawyaw ug mihulga nga dauban niya ang balay sa iyang apohan.

Sa dihang nabati sa biktima ang bahad sa suspek, mitimbakuwas kini og bangon ug gibadlong ang naulahi.

Apan inay maminaw, mikuha hinoon og dos por dos dayon giligid og latigo ang kaugalingon niyang apohan.

Nahagba ang biktima sa yuta ug gidali kini paghatod sa iyang kabanay ngadto sa Cuenco Memorial Medical Center sa Ginatilan.

Ang suspetsado gikustodiya karon sa kapolisan sa maong lungsod.  - BANAT NEWS