Fixers sa City Hall gibantayan

CEBU, Philippines - Ang kagamhanan sa siyudad sa Sugbo mipahimangno sa ilang mga konstituwente nga dili magpailad sa pipila ka mga fixers nga moingong maoy mo-proseso sa burial assistance.

Matud pa sa chief of staff ni Mayor Michael Rama nga si Philip Zafra nga ang mga staff sa Burial Assistance Program sa siyudad motabang sa pagbantay sa pagsanta sa mga fixers.

Nagkanayon si Zafra nga nakadawat siya og mga reklamo sa pipila ka mga namatyan nga adunay mga tawong miduol kanila ug mipresentar nga maoy mo-proseso sa burial assistance gikan sa siyudad alang sa mitaliwan nilang kabanay bugti sa P300 ngadto sa P500 nga bayad. Ang maong programa naghatag og P10,000 nga financial assistance ngadto sa mga residente sa Sugbo sugod pa niadtong tuig 2009. Kini agi og tabang sa mga pamilyang kabus nga mamatyan og sakop sa pamilya.

Dugang pa ni Zafra nga ila gyud kini nga istriktohon aron dili makasulod ang mga fixers gumikan kay dili lalim ang mamatyan unya pangayoan pa gyud sa mga mangingilad.

Una na nga mipadayag kaniadto si Rama nga kinahanglang pangunayan sa mga hingtungdan pag-adto ang mga departamentong maoy gitugyanan sa nagkadaiyang programa sa siyudad aron maseguro nga maka-avail kini sa serbisyo sa siyudad ug dili ipaagi sa fixers. Giklaro sa maong departamento nga dili tinuod nga mas madali ang pag-release sa burial assistance kun lihukon sa mga fixers sanglit patas ang paghikay niini sa dakbayan.  - BANAT NEWS