2 kaso ipasaka vs nurse

CEBU, Philippines - Dili lang unya kasong kriminal ang posibleng atubangon sa usa ka giingong nurse nga nadakpan sa mga sakop sa Provincial Investigation and Detective Management Branch niadtong Biyernes sa gabii kay posibleng madugangan pa kini og kasong administratiba tungod sa pagpamaligya og P1.8 milyon nga nubain.

Si Supt. Henry Biñas ang hepe sa PIDMB mibutyag nga kung ilang mapamatud-ang usa ka rehistradong nurse si Leonarda Macauyag Lim mahimo nila kining pakasuhan og administratiba.

Matod ni Biñas nga sutaon niya karong adlawa kung si Lim anaa ba gyud sa listahan sa Professional Regulations Commission (PRC) human kini mangangkon nga usa siya ka nurse.

Si Lim, 55, taga Lower Pakigne, Minglanilla matud pa ni Biñas nakalapas sa balaod tungod sa paghupot ug pagbaligya og ginadiling drugas sama sa Nubain ug gikatakda nilang pasakaan og kasong kriminal karong adlawa sa Provincial Prosecutor’s Office.

Sumala pa ni Biñas base sa impormasyong ilang nakuha, si Lim makabaligya og 2,000 ampules sa Nubain nga nagkantidad og P600,000 matag semana. Dugang ni Biñas nga ang mga sudlanan sa Nubain dunay tatak nga gikan sa Pakistan apan matud pa sa ilang impormante nga ang tanang Nubain gikan lang sa Manila.

“Base lang sa label, Pakistan gikan pero dili pud ta sigurado kay pwede emit (emitations) lang,” matud ni Biñas sa pakighinabi sa The Freeman/Banat News.

Niadtong Biyernes sa gabii, si Lim nadakpan sa mga operatiba nga gipanguluhan ni Biñas diha sa parking area sa usa ka mall sa siyudad sa Talisay human sa gipahigayong buy-bust operation.  

Human sa transaksyon nakuhaan pa gyud ang suspect og laing duha ka karton nga dunay sulod nga 4,000 ampules sa Nubain.

Ang Nubain kaniadto gikonsiderar lang nga ‘regulated drug’ tungod kay gamitunon kini sa pagpanambal sa mga grabeng sakit. Ug bugtong ang dakbayan sa Sugbu lang maoy adunay ordinansang nagsilot sa masakpang miabuso niini.

Apan tungod kay gi-abuso na kini karon sa tibuok nasud gideklarar na kining illegal drugs diha sa RA 9165.

Matud pa ni Biñas si Lim ang labing dakong distributor og Nubain sa Metro Cebu ilabi na sa Minglanilla, Talisay City ug Kamagayan, Cebu City.  - BANAT NEWS