Pagpanglimpyo sa mga sam-ang sugdan

CEBU, Philippines - Gimandoan na ni Mayor Michael Rama ang mga opisyales sa barangay nga magsugod na sa ilang preparasyon alang sa hapsay nga pagtamod sa Kalag-kalag.

Gipasabot ni Rama nga gawas sa mga polis, kinahanglan ang kooperasyon sa mga opisyales sa barangay nga maoy modestino og mga tanod sa mga sam-ang duol sa ilang barangay.

Miawhag nang daan ang konseho sa siyudad ngadto sa mga tagdumala sa mga pampubliko ug pribadong sam-ang nga imentinar ang kalimpyo sulod sa ilang palibot.

Giawhag usab sa konseho nga kinahanglan nga dili gyud kalimtan ang pagbutang og karatola sa menteryo aron dili masaag ang mga tawo nga moduaw sa minahal sa ilang kinabuhi.

Samtang si Mayor Rama mipasidaan nga kinahanglan gyud nga motuman ang publiko sa saktong paglabay sa ilang mga basura sulod sa menteryo partikular na sa pagbahig niini sa malata ug dili malata.

Ang kapitan sa Barangay Guadalupe nga si Michael Gacasan mibutyag dinhi sa Banat News nga mohimo sila karong adlawa og clean-up-drive sam-ang sa Calamba aron maseguro nga limpiyo ang palibot samtang nagkaduol na ang Kalag-kalag.

Gawas sa Calamba manglimpiyo usab ang iyang mga sakop sa Good Shepherd kung diin dunay pipila ka mga Insik ang gilubong sa maong dapit.

Suma pa ni Gacasan nga naandan na sa Barangay Guadalupe nga motabang gyud sa mga menteryo tupad sa ilang barangay.

Matud pa niya nga motabang ang iyang mga tanod sa pagbantay sa trapiko ingon man usab sa pag-monitor sa kahusay ug kalinaw sulod sa menteryo.  - BANAT NEWS