Canonization ni Blessed Pedro Calungsod gipaabot

CEBU, Philippines - Masaligon ang Archdiocese sa Sugbo nga mamahimong ikaduhang Santos nga Filipino ang Sugbuanong si Blessed Pedro Calungsod sunod kang San Lorenzo Ruiz human gilihok na ang proseso alang sa canonization niini didto sa Vatican.

Si Msgr. Esteban Binghay, Episcopal Vicar sa Artdyosesis sa Sugbo midetalye nga si Cebu Archbishop-emeritus Cardinal Vidal milarga niadtong miaging buwan paingon sa Roma isip sakop sa Assembly of Cardinals nga magbotasyon alang sa canonization ni Blessed Pedro Calungsod. “Nag-meeting sila ug na-aprobahan human sa botasyon ug magpaabot nalang ta sa tubag sa Santo Papa. Naglaum ta nga sa Disyembre i-announce na sa opisina sa Santo Papa kun sugdan na ba ang canonization process,” matud pa ni Binghay.

Lig-on ang pagtuo ni Binghay nga moabot ang panahon nga tawgon si Calungsod nga santo tungod usab kay personal siya nga nakasaksi sa gipakitang milagro sa martir kinsa gipatay tungod sa iyang pagtabang sa pagkatap sa Kristiyanismo niadtong tuig 1672 didto sa Guam.

Si Calungsod gi-beatify niadtong Marso 5, 2005 ni Pope John Paul II ug matag Abril 2 nga maoy iyang adlaw’ng natawhan gisaulog nga maoy Blessed Pedro Calungsod Day sa mga simbahan.

“Naay gyuy chance masantos, mismo ako nakakita sa milagro five years ago dihang usa ka babaye nga adunay sakit sa kasing-kasing ang naayo human siya ug iyang doktor nag-ampo ngadto ni Blessed Calungsod,” segun pa ni Binghay.

Hinuon, giklaro ni Binghay nga dili dali ang proseso sa pagdeklarar sa usa ka martyr aron mahimong santos tungod kay moagi pa kini sa makuti ug grabeng pagtuon gikan sa mga eskperto sa mga milagro didto sa Vatican. Ang milagro naglangkob sa pagkaayo gikan sa sakit nga walay medisinang gitumar ang gimilagrohan. (BANATNEWS)