Gumikan sa kakabus, asawa naghikog

CEBU, Philippines - Usa ka asawa kinsa wala na kaantos sa kalisud sa ilang pagpuyo naghikog pinaagi sa paghikot og pisi sa iyang liog sulod sa ilang balay didto sa Isla Berde, sa barangay Dunggoan, dakbayan sa Danao sa miaging hapon.

Si SPO3 Ildefonso Prosia miila sa maong ginang nga si Miraflor Arnaiz, 23, nga nagpuyo sa maong dapit.

Matud pa ni SPO3 Prosia nga dihang gisukit nila si Retchie, ang bana sa namatay, mitug-an kini nga gikan pa siyang nanagat, aron may ikapalit og bugas alang sa ilang panihapon niadtong higayona.

Midugang si SPO3 Prosia nga may pagtuo ang bana sa namatay nga ang gikagul-an pag-ayo sa iyang asawa hinungdan sa paghikog niini mao ang kalisud sa ilang pagpuyo kay usahay wala silay kaon-kaon matag adlaw kay wala silay ikapalit og bugas.

Matud pa ni Richie nga panagat ray iyang panginabuhi ug kun wala siya’y makuhang isda, wala usab silay ikapalit og bugas hinungdan nga pirme silang gutman.

Nagkanayon kini ngadto sa kapolisan nga sa paghiabot niya sa ilang balay niadtong Biyernes sa hapon nakurat siya dihang maoy nakita niya pag-abli sa ilang pultahan ang asawa niyang nagbitay na sa pisi.

Kini pinaagi sa gihikot nga pisi sa liog kansang pikas tumoy gigaid sa sagbayan sa ilang balay.

Gidali sa bana pagtangtang ang pisi sa liog sa iyang asawa ug gisakwat niya kini ug gihatod ngadto sa Danao District Hospital apan gideklar kini sa mga doktor nga dead on arrival.

Hinuon si SPO3 Prosia miingon nga ilang ipaubos sa autopsy ang patay’ng lawas sa maong ginang aron pagsuta kun may foul play ba o wala ang kamatayon niini.  - BANAT NEWS