CEBU, Philippines - Talandugon ang 13- anyos nga dalagitang tinun-an sa 2nd year high school human dunggaba sa gidudahang molugos unta kaniya nga iyang gisuklan diha sa mingaw nga lugar sa sitio Manan-aw sa barangay Bantigue lungsod sa Bantayan samtang kini pauli na gikan sa eskuwelahan niadtong Miyerkules sa ala 1:30 sa hapon.
Ang biktima (pangalan gitago) tinun-an sa 2nd year sa Ticad National high School ug nagpuyo sa maong lugar samtang padayon pa ang kapolisan pagpangita sa batan-ong gikatahapan.
Matud ni SPO4 Julian Pasquite, deputy chief sa Bantayan Police Station sa Banat News nag-inusarang naglakaw gikan sa eskuwelahan human sa klase ang biktima ug pag-abot sa maong lugar kalit kining gibabagan sa maong lalaki.
Matud pa ni Pasquite kalit gibira sa maong lalaki ang bata hinungdan nga milugnot ug nagpunay kini og singgit pagpangayo og tabang. Tungod sa kasuko sa lalaki gidunggab niini ang bata sa kalawasan.
Ang biktima daling gihatud sa Bantayan District Hospital ug sa paghimo ning balita padayun pang gi-atiman sa mga doktor samtang padayon ang follow up investigation sa kapulisan. (BANATNEWS)