CEBU, Philippines - Nadakpan sa mga sakop sa Special Reaction Unit (SRU) nga nagbasi didto sa lungsod sa Balamban ang 37-anyos nga lalaking taga Baybay, Leyte nga giingong nangompra og marijuana sa sitio Enad barangay Gaas, Balamban niadtong Miyerkules sa alas 7:00 sa gabii.
Ang nadakpan nga suspek mao si Jude Uy Puliquit, 37, human nakuhaan og tunga sa kilong pinaugang dahon sa marijuana nga gisud sa plastik ug gisud sa puwang bag niini. Giingong dad-on unta kini ngadto sa Baybay, Leyte.
Matud ni SPO1 Juluis Obana sa Balamban Police dihang nahinabi sa Banat News nasigpatan kini sa mga sakop sa SRU nga kadudahan ang lihok nga nagdala og dakung bag diha sa pinuy-anan ni Cresenciano Bacus.
Dihang ilang gisukit-sukit ug gisusi ang bag niini nakit-an ang dakung putos sa plastik nga puno sa pinaugang dahon sa marijuana hinungdan sa pagkasikop niini.
Usa ka residente nga taga sitio Calubian, barangay Manunggal ang gitumbok niini nga maoy iyang komprahanan sa mga marijuana. Ang suspek nagtingkagol na karun sa karsel samtang gihikay ang kasong ipasaka batuk niya. (BANATNEWS)