30 barangay officials nalanag

CEBU, Philippines - Nalandig sa tambalanan ang kapin 30 ka barangay officials gikan sa Caloocan City nga mitambong og seminar sa usa ka inilang hotel diha sa dakbayan sa Lapulapu gumikan sa pagpanakit sa ilang mga tiyan ug pagsuka.

Sa report sa Balitang Bisdak kagahapon, adunay kapin 80 ka mga barangay officials ang mipahigayon og seminar sa usa ka hotel sa nahisgutang syudad diin didto usab sila nangaon sa maong hotel.

Human sila mangaon gikatahong ang kapin 30 kanila ang gibati na pagsakit sa ilang mga tiyan hinungdan nga dali silang gidala sa Lapulapu City District Hospital apan gipagawas usab kini dayun.

Matud pa sa hepe sa maong tambalanan Dr. Bolivar Miñoza Jr. nga wala nila matino kung unsay hinungdan sa panakit sa ilang tiyan tungod kay wala nila sila mapaubos sa laboratory test.

Apan base sa mga medical certificate sa mga biktima nakita nga acute gastro enteritis ang nasinati nila.

Samtang ang vice president sa Liga ng mga Barangay nga si Conrado Cruz mipasabot nga nasobrahan lang og kaon ang iyang mga kaubanan maong gisakitan sa ilang mga tiyan.

Ang general manager sa hotel diin mikaon ang mga barangay officials nga gisakitan og tiyan mipasabot nga wala malanag sa pagkaon ang mga officials. (BANATNEWS)