Basurero gipatay

CEBU, Philippines - Hangtud karun wala pa mailhi sa kapulisan ang usa ka lalaking basurero nga gipusil makadaghang higayon sa miaging gabii diha sa South Road Properties Gate 1 sa dalan D. Jakosalem sa barangay Sto. Niño siyudad sa Sugbu.

Ang biktima gibana-banang nagpangidaron 20-anyos, kasarangan ang gidak-on, 5’0” ngadto sa 5’2” ang gitas-on nga nagsul-ob itom nga short pants.

Nailhan hinuon ang suspetsado nga mipusil sa biktima nga giila sa kapulisan nga mao si Rodito Branzuela alyas Gamol ug Ongkol nga kasamtangan nagpuyo sa maong lugar apan taga P. Burgos St. sa barangay Sto. Niño.

Upat ka mga kabhang sa bala ang nakuha sa kapulisan sa crime scene nga .45 nga kalibre sa armas.

Sa pasiunang imbestigasyon ni SPO1 Victor Ruel Ayuman ug mga kaubanan sa Homicide Section sa Cebu City Police Office (CCPO) upat ka sunodsunod nga buto sa armas ang nadunggan sa mga residente sa dapit.

Dihang ilang gisusi nakit-an nila ang biktima nga nahagba ug naglunang sa kaugalingong dugo ug may samad pinusilan sa ibabaw nga bahin sa iyang bukton ug ilok.

Ang mga sakop sa Police Station 3 nga gipangulohan ni Chief Insp. Andres Bayarcal daling miresponde sa nahitaboan ug mao nay midala sa Cebu City Medical Center (CCMC) sakay sa ilang patrol car apan gideklarar kini sa mga doktor nga dead on arrival (DOA). (BANATNEWS)