Kontrata sa siyudad sa spa i-review tungod sa pagsaway

CEBU, Philippines -  Mosusi na ang Ombudsman for the Visayas pinaagi sa usa ka fact-finding investigation sa kontrobersyal nga spa service nga gisudlan sa dakbayan sa Sugbu alang sa physical maintenance sa mga opisyales niini.

Si Assistant Deputy Ombudsman for the Visayas Virginia Palanca-Santiago miingon nga nanguha na sila og news files labot sa maong isyu.”Sometimes it is okey to be watchful.”

Buot susihon sa anti-graft office kung legal ba ang paggastos sa siyudad og kwarta alang sa serbisyo sa Holiday Gym and Spa.

Gitahod ni Konsehal Joey Daluz ang desisyon sa mayor kalabot sa tinguha niini nga pag-withdraw sa iyang parte sa kontrata sa siyudad nga walay limit sa mga opisyales sa siyudad nga paggamit sa kahimanan sa   Cebu Holiday Spa nga nahimutang diha sa Banilad.

Dugang pa ni Daluz nga bukas usab siya sa pag-pa-review sa kontrata ug iyang konsultahon ang iyang mga kaubanan sa konseho kung magpadayon pa ba sila o dili ilabi na karon nga nakadawat sila og mga pagsaway sa katawhan.

“Maminaw man gyud ta sa mga tawo, maong amo jud na ipa-review ,” matud pa sa konsehal.

Ang maong kontrata nga miabot ngadto sa P360,00 sanglit P18,000 man ang membership fee matag usa sa 20 ka opisyales sa siyudad nga naglangkob sa mayor, bise mayor ug 18 ka mga konsehal nga nagsugod niadtong Mayo ug matapos sa sunod tuig.

Apan si Bise Mayor Joy Augusus Young misaysay nga bisan moingon si Rama nga mo-withdraw siya sa iyang kaugalingon sa nahisgutang serbisyo, magpabilin gihapon nga P360,000 ang mabayran sa siyudad sanglit package man ang ilang gikuha. (BANATNEWS)