Piniriso nagdunggab sa dughan

CEBU, Philippines - Nunot sa makalilisang nga masaker-suicide sa usa ka pamilya sa dakbayan sa Talisay, usa ka lalaking gipapriso sa iyang asawa ang misuway paghikog sulod sa karsel sa Consolacion Police Station pinaagi sa pagdunggab sa iyang kaugalingon atubangan sa iyang anak pasado alas-11 sa buntag kagahapon.

Si Nicodemus Suarez, molupyo sa barangay Cabangahan sa maong lungsod ug usa ka construction worker gipapriso sa iyang asawa kagahapon sa buntag tungod sa pagpanapat niini ug paghulga sa iyang pamilya nga parehason sa nahitabo sa Talisay massacre.

Apan dihang diha na kini sa karsel gibati og kahiubos si Suarez sa iyang pamilya ug dihang gibisita kini sa iyang anak nagdunggab kini sa iyang dughan diha sulod sa karsel aron maghikog.

Sumala pa sa reklamo sa asawa niini nga gawas nga manapat kini kanila magpabuto usab kini sa iyang armas sama sa gibuhat niini niadtong milabay’ng gabii.

Nasuta usab nga tiggamitan og marijuana ang suspek ug ang mismong asawa niini mitunol sa mga polis sa maong ilegal nga drugas nga iyang gikuha sa gitagoan sa bana diha sa ilang balay.

Gawas ni Suarez dihay laing piniriso nga nakasaksi sa iyang pagdunggab sa kaugalingon apan wala motabang tungod sa kahadlok.

Matud pa ni PO2 Johanskie Romero nakurat sila sa kalit nga pagtiyabaw sa anak ni Suarez pagbisita niini kagahapon sa buntag maong ilang gisusi.

Si Suarez nagkadugo na niadtong tungura sa dughan hinungdan nga ilaha kining gitabang ug gidala sa Vicente Sotto Memorial Medical Center.

Nakuha sa mga polis ang usa ka walo ka pulgadang kutsilyo gikan kaniya. Padayon pa ang ilang imbestigasyon nganong dunay kutsilyo sa sulod sa karsel.

Sa report sa ABS-CBN Central Visayas , ang asawa ni Suarez mibutyag nga napugos siya pagpapriso niini tungod sa pagpanapat ug pagpanghulga kanila nga sila pamatyon isunod sa Talisay massacre.

Gihulagway sa mga psychologists nga ang gihimo ni Suarez gikatawag og copy cat suicide nga bunga sa pagkopya sa gibuhat sa uban tungod usab sa grabeng gibating emosyon sa kaugalingong problema. (EIM) (BANATNEWS)