Estudyante gilugos sa 3 ka sikyu

CEBU, Philippines - Usa ka 22-anyos nga tinun-an sa Medical Technologist (Medtecth) sa inilang unibersidad sa dakbayan sa Sugbo gitabangan og lugos sa tulo ka mga student guard sulod sa barracks sa maong unibersidad sa miaging Biyernes sa gabii.

Ang biktima kansang ngalan gipugngan miasoy sa TV5 News nga ang mga manlulugos nakigsuod kaniya human kini ipaila-ila kaniya sa iyang uyab.

Matud pa niya nga sa wala pa siya lugosa, misalmot una siya sa ilang inom og alak sulod sa barracks nianang alas 9:00 pa sa gabii.

Dihang miabot na   sa ala 1:00 ang takna sa kaadlawon sa adlaw’ng Sabado    ug pulos na sila nangalasbag, namatngonan niyang naluya na siya kaayo hangtod nga nalumoy siya ug nawad-an og    umoy.

Apan bisan sa kaluya niya, iyang namatngonan    nga may mihinol sa iyang kalawasan ug   may gipasok   sa iyang kinatawo.

Gidudahan sa biktima nga gisagolan sa mga kriminal ang iyang giinom og kemikal nga makapaluya kaniya niadtong higayona.

Pagkamatngon niya og kabuot niadtong Sabado   sa buntag nagkadugo na ang iyang   underwear hinungdan nga midali siya sa pagpauli sa ilang balay ug misumbong   sa iyang ginikanan bahin sa nahitabo kaniya.

Dihadiha misumbong   dayon ang iyang   mga ginikanan   sa buhatan sa Criminal Investigation and Detection Group (CIDG) kinsa milihok usab dayon sa pagpangita sa mga manlulugos.

Matud ni Chief Insp. Fermin Armendares   sa CIDG nga namahawa na sa ilang boarding house ang duha ka suspetsado atol sa ilang gihimong follow-up operation niadtong Lunes, busa usa ra sa tulo ang ilang nadakpan. Apan ang ilang mga ngalan lakip na sa nadakpan    gipugngan usab gihapon sa kapolisan.

Kagahapon pormal nang gisang-at ngadto sa City Prosecutors Office ang kasong rape batok sa tulo ka mga suspetsado. - Rey B. Pasaporte/WC (BANATNEWS)