'Gidakdaka'g bato sa karibal

CEBU, Philippines - Kritikal ang kahimtang sa usa ka mekaniko kinsa gidakdakan og bato human kulataha sa karibal niya sa gugma didto sa sitio Teeners, barangay Tuyan, dakbayan sa Naga kagahapon sa alas 3:00 sa kaadlawon.

Ang biktima mao si Allan Candol, 36, minyo, nga taga   Linao siyudad sa Talisay ug usa ka mekaniko, samtang ang suspek mao ang iyang karibal nga si Clotty Torres, 25, ulitawo, nga taga barangay Tulay lungsod sa Mingnilla, ug lumad nga taga Sta. Catalina Negros Oriental.

Samtang ang ilang gi-ilogang babaye mao si Mae Yanos, 22, dalaga, ug usa ka Guest Relation Officer (GRO).

Si PO3 Antonio Albete sa Naga City Police mibutyag sa Banat News nga ang biktima namisita sa iyang naibgang si Yanos nianang alas 2:45 sa kaadlawon didto sa gipuy-an niini. Apan miabot usab dayon ang suspek nga kanhi hinigugma ni Yanos.

Gumikan kay nagselos ang suspek, ilabi na nga tam-is kaayo og pahiyom ang GRO ngadto sa biktima, mihiwasa kini sa kasuko ug gipaluparan dayon sa iyang kumo ang biktima, dayon gihapak og dakong bato.

Ang biktima nga wala mosukol mikabad og dagan paingon sa ilang balay unya mikatkat kini sa ilang koral, apan ang suspek nga mimangtas pag-ayo sa maong higayon migukod sa biktima ug dihang naapsan kini, gikulata ug dihang nahagba gidakdagan og dakong bato.

Gibiyaan sa suspek ang biktima nga nakuyapan ug wala nay panimuot.

Ang kapolisan   mao nay miugkat sa biktima ug mihatod ngadto sa tambalanan niini, samtang padayon pa nilang gipangita karon ang suspek.

Nagpanlingo ang kapolisan ug nagkanayon nga delikado lagi ning bisan minyo manguyab lang gihapon. - Darrel A. Carumba/WC (BANATNEWS)