Wa mohatag sa iyang cellphone giluba

CEBU, Philippines - Gumikan sa pagmagahi og hatag sa iyang cellphone usa ka tinun-an gidunggab sa tulo ka mga tulisan diha sa barangay Babag dakbayan sa Lapulapu sa milabay’ng gabii.

Ang biktima mao si Gil Dosdos, 19, residente sa Calawisan dakbayan sa Lapulapu usa ka 2nd year sa Babag Night High School.

Matud pa ni Dosdos gikan sa tunghaan ug padulong na pauli ang biktima dihang giatangan sa tulo ka batan-on ug ang usa mibunlot sa iyang cellphone.

Apan nagmagahi si Dosdos paghatag niini hinungdan nga gibunalan siya og kahoy sa usa ug gibunlot ang iyang kwintas. Laing suspek ang midunggab kaniya ug diha na nakuha ang uban pa niyang butang.

Bisan samaron mipauli sa ilang panimalay si Dosdos ug ang mga kabanay na niini ang midala kaniya ngadto sa tambalanan.

Nagduda ang kapolisan sa Lapulapu nga grupo sa mga gang o fraternity ang mihimo sa maong krimen ug padayon pa nila silang giila.(Bong Soriano/EIM) (BANAT)