3 angol sa karambola sa sakyanan

CEBU, Philippines - Tulo ang naangol human magkarambola ang duha ka pasaheroang bus ug usa ka garbage truck diha sa highway sa Looc Poblacion sa lungsod sa Liloan alas 5:50 kagahapon sa buntag.

Ang mga naangol mao ang drayber sa bus nga dunay plaka nga GWR-146 nga si Junjie Batoon, taga barangay Guinsay siyudad sa Danao ug ang pasahero niini nga si Judilyn Moncada, 20,nagpuyo sa Doña Rosario Village sa dakbayan sa Mandaue.

Samtang naangol usab ang drayber sa gikabangga niining dunay plaka nga GVV-889 nga si Cheer Roche Laurente, taga barangay Guinsay gihapon sa dakbayan sa Danao.

Samtang ang ikatulo nga sakyanan nga nalambigit sa aksidente mao ang garbage compactor truck sa lungsod sa Liloan nga gimaneho ni Armando Arquisar taga Cotcot, Liloan.

Matud ni SPO1 Claudio Castro Jr., sa Liloan Police Station dihang nahinabi sa Banat News si Laurente paingon sa siyudad sa Sugbo ug kasugat niini si Batoon apan pag-abot sa maong lugar kalit lang mi-overtake si Batoon sa nag-unang sakyanan apan naatol nga kasugat niini si Laurente.

Tungod sa kakusog sa impact nalahos ang maong sakyanan sa nangolekta’g basura nga garbage truck niadtong tungura. Atol sa hitabo si Batoon maoy dugay naugkat gikan sa pagkapiit sa frontseat.

Ang mga samaron gidala sa Vicente Sotto Memorial Medical Center (VSMMC).(Darrel Carumba ug Romeo Limpangog/EIM) (BANAT)