'Garbage barge' gidepensahan ni Rama

CEBU, Philippines - Gidepensahan ni Mayor Michael Rama ang iyang sugyot nga mopalit og kaugalingong barge ang siyudad sa Sugbo aron maoy mosuroy sa coastal areas alang sa pagpangolekta og mga basura.

Nasayran nga giapil sa mayor ang maong proyekto alang sa sunod tuig nga budget ug pagahinan niya kini og P50 milyones apan ipaubos pa gihapon kini sa budget hearing diha sa   konseho.

Matud pa sa mayor nga gawas sa patag, angayan pud nga tagaan og pagtagad ang dali nga paghipos og basura sa kadagatan ubos sa hurisdiksyon sa siyudad sa Sugbo.

Ang mga basura nga manglutaw diha sa Mactan Channel nagagikan ang uban sa mga dagkong kanal sa dakbayan sa Sugbu ingon man sa ubang mga siyudad sa Metro Cebu.

Dugang pa niya nga kun makaangkon na og barge ang siyudad dali ra malimpiyo ang coastal areas nga makahatag usab og nindot nga atraksyon.

Gitataw ni Rama nga seryoso karon ang iyang kampanya sa saktong paghipos og basura maong matag hapon adunay gihimong panagtigom sa nagkadaiyang pundok kabahin sa kampanya aron mas maatiman pa ang maong suliran.

Samtang mapasalamaton ang mayor sa mga Sugbuanon gumikan kay mayoriya karon ang mituman na gyud sa saktong pagbahin sa basura ngadto sa malata ug dili malata.(Sanden J. Anadia/EIM)  (BANAT)