CEBU, Philippines - Talandugon ang kahimtang sa usa ka ex-army nga karon sakop na sa Barangay Intelligence Network (BIN) human kini gipusil samtang nag-inom sa usa ka birthday party nga iyang gitambungan sa sitio Tubod barangay Pundol sa lungsod sa Balamban niadtong Lunes sa alas 3:05 sa kaadlawon.
Ang biktima mao si Andres Ganohay Navio, 46, nagpuyo sa barangay Baliwagan sa maong lungsod kinsa nakaangkon og samad pinusilan sa liog.
Samtang ang suspek mao si Cristobal Gino Abendan, 23, nagpuyo usab sa maong lugar kinsa padayon pang gipangita sa kapolisan.
Matud ni SPO1 Juluis Obanana sa Balamban Police Station dihang nahinabi sa Banat News subay sa imbestigasyon giimbitar sa usa ka Emerita Combista ang biktima tungod sa birthday party ingon man blessing sa pinuy-anan niini.
Samtang nagkanta ug nag-inom ang biktima ug ubang mga bisita kalit miabot ang suspek ug miduol sa biktima ug gidul-itan kini pagpusil sa liog makausa ka higayon, ang mga bisita nag-alibwag og panagan lakip na ang suspek.
Ang biktima gihatud sa Balamban District Hospital apan gibalhin sa tambalanan dinhi sa dakbayan sa Sugbo.
Ang kapulisan padayun pa sa ilang imbestigasyon sa krimen ug gisusi na kun may kalambigitan ba kini sa iyang pagka BIN o personal nga bangi ngadto sa suspek. (BANAT NEWS)