Kabanay sa biktima sa masaker gipabantayan

CEBU, Philippines -  Naghigpit na ang mga kabanay sa mga biktima sa masaker sa dakbayan sa Talisay diha sa punerarya sa Saint Peters Funeral Homes sa Lorega-San Miguel ning dakbayan ug gipabutangan og polis aron masigurong solemno ang ilang pagbangutan.

Si Chief Supt. Marcelo Garbo, pangulo sa kapulisan sa rehiyon nga nahinabi sa mga tigbalita human sa 888 News Forum sa Marco Polo Plaza Hotel kagahapon sa buntag nagkanayon nga nanawag kaniya ang mga kabanay ni Melinda Ponce sa kaulohan nga anaa usab magtrabaho sa gobiyerno ug mihangyo nga pabutangan og mga pulis ang maong punerarya.

Matud ni Garbo nga ilaha pang tan-awon og maayo kun unsay ilang mapasaka nga kaso kun ugaling naa man gani subay unya sa resulta sa imbestigasyon apan posibling wala nay kaso kay nagpusil man usab ang padre de pamilyang si Emmanuel Ponce sa iyang kaugalingon. Samtang si Garbo nagkanayon nga posibleng wala pay problema sa panghuna-huna si Emmanuel dihang nakakuha kini og lisensya sa iyang armas.

Sa nasayran si Emmanuel nadisgrasya sa barko nga iyang gisakyan kapin na sa napulo ka tuig ang nakalabay nga miresulta sa pag-opera sa ulo niini ug giingong sukad niadto saputon na kini, magselos sa iyang asawa ug gamay lang ligas sa iyang pamilya mosampot dayon sa away nilang magtiayon.

Matud ni Garbo nga kinahanglang estriktuhon ang pagkuha og lisensya sa armas ilabi na sa mga sibilyan ilabi na sa neuro psychiatric test kun wala ba kini deperensya sa pangisip.

Giangkon ni Garbo nga maglisud gyud sila og control sa mga domestic violence ilabina kun ang mga babayeng biktima dili mo-report sa kapulisan. Dunay higayon nga anha pa mosulod ang kapulisan kun duna nay gipatay tungod sa domestic violence.

Matud ni Garbo bugtong nilang mahimo sa kapulisan mao ang kanunay pagpahimangno ngadto sa mga kababayen-an nga dili magpakahilom kun sila abusohan.

Si Sr. Supt. Louie Oppus, Deputy Regional Director for Operations (DRDO) sa Police Regional Office-7 nga nahinabi sa mga tigbalita nagkanayon nga ang lisensya sa armas ni Emmanuel karun pang 2013 mo-expire, iyaha kining nakuha niadtong 2009.

Matud ni Oppus posibleng nakuha ang lisensya sa armas ni Emmanuel niadtong 2009 atol sa duha ka amnesty program sa gobiyerno diin ang ubang mga rekisitos niini gi-wave.

Laing susihon nila ang report nga sakop sa usa ka gun club si Emmanuel maong nakakuha kini og lisensya sa iyang armas.

Si Oppus miingon usab nga ang kaso sa domestic violence anaa ra gyud sa cultural background sa usa ka pamilya nga kinahanglan unta nga hiloton ang problema tali sa magtiayon.

Gitukod sad sa PNP ang Women and Children’s Protection Desk (WCPD) aron makatabang sa mga kababayen-ang dunay problema sa domestic violence. (BANAT NEWS)