Bendetadong rosaryohan maoy gitunol ni Garcia sa bata

CEBU, Philippines -  Gibisita nilang Gob. Gwendolyn Garcia ug Bise-Gob. Agnes Magpale ang haya sa mga biktima sa masaker sa dakbayan sa Talisay sa St. Peter Funeral Homes sa New Imus Road, dakbayan sa Sugbo.

Ninglungtad lang og 10-minutos ang pagbisita sa duha ka tag-as nga opisyal sa Kapitolyo ug ilang nahinabi ang nahabiling 14-anyos nga sakop sa pamilya.

Gidid-an hinuon sa kabanay ang mga sakop sa media nga makapaduol sa dalagita aron dili kini mahinabi.

Usa ka daku ug gamay nga sobre ang gitunol ni Garcia ngadto sa nailong anak.

Apan si Garcia mibutyag nga iyang personal nga rosaryohan nga gibendisyonan sa Santo Papa ang iyang gihatag sa bata aron iya kining magamit sa pag-ampo.

Lakip sa gihatag ni Garcia ang personal niya nga numero sa cellphone aron may matawagan kini kung may gikinahanglan ilabi na nga wala nay ginikanan ug mga igsuon ang 14-anyos.

Matud pa niya nga pag-ampo ra gyud ang matabang ngadto sa kabanay sa mga biktima human sa maong makalilisang nga hitabo.

Ang kabanay mihangyo sa mga sakop sa media nga respetohan ang pribadong kahimtang sa pamilya ilabi na nga anaa pa sa pagbangutan.

Gitagsa-tagsa ni Garcia ug Magpale sa paglili ang unom nga lungon nga naglumbay sa usa ka lawak sa punerarya nga ila ni Emmanuel Ponce, 55, kinsa maoy nipusil sa iyang asawa nga si Melinda, 53, mga anak nga sila si Elaine Grace, 26, Heather Joy, 25, ug Emlin, 18 ug sa ilang katabang nga si Anastacion Deniega, 30. (BANAT NEWS)