CEBU, Philippines - Gidakop ug gipaslak sa karsel ang usa ka 37-anyos nga inahan nga mikulata sa iyang 11-anyos nga anak nga babaye ug mipakumkom niini og baga sa duha ka mga kamot tungod kay gipasanginlan ang bata sa silingan nga nangawat.
Ang maong inahan nga gikatakdang pasakaan og kasong kalapasan sa RA 7610 kon Child Abuse gipadakop sa iyang bayaw ug mga silingan inabagan sa mga polis ug social welfare officers sa lungsod sa Liloan niadtong Lunes sa hapon.
Sumala pa ni PO2 Rutchel Jugalbot sa Liloan Police Station ang bata nga tinun-an sa Grade 5 gikatahong nasakpan sa silingan diha sa barangay San Vicente nga nagkupot og yawe aron lugiton ang sudlanan sa mga sensilyo sa kompyuteran niini.
Tungod niini, ang tag-iya sa kompyuteran misikop sa bata ug midala ngadto sa inahan niini ug gipahibalo kabahin sa gibuhat sa anak.
Tungod sa kauwaw sa gibuhat sa anak gikulata niya kini ug gigaid og pisi diha sa haligi sa ilang balay ug pagkahuman mikuha og nagbagang uling ug pugsanong gipakumkom sa mga kamot sa bata.
Ang pagtiyabaw sa bata nakapukaw sa kasingkasing sa mga silingan ilabi na sa uyoan niini kinsa wala makaagwanta sa gidangatan sa pag-umangkon misumbong sa kapulisan.
Ang mga polis inubanan sa mga tinugyanan sa municipal social worker daling miadto sa panimalay sa bata ug giluwas kini gikan sa dugang pag-abuso sa inahan niini. Ang inahan ilang gidala sa presinto ug gibalhog kini.
Ang biktima kasamtangang gikustodiya sa DSWD samtang ang suspek nagtingkagol sa karsel ug gihikay na ang kasong ipasaka niini.(EIM)(BANAT NEWS)