Radaza mipahigayon sa iyang SOCA

CEBU, Philippines - Kaliboan ka mga tinun-an sa dakbayan sa Lapulapu ang   mitambong sa State of the City Address (SOCA) ug State of the Childrens Report (SOCR) ni Lapulapu City Mayor Paz Radaza sa Hoopsdome sa Brgy. Gun-ob kagahapon sa hapon.

Gipadayag ni Radaza ang paghatag niya og importansiya sa mga kabataan atol sa iyang SOCR nga giatol usab sa kasaulogan sa   Childrens Month.

“My administration believes that the welfare of the children is tantamount to building and shaping the future citizens of the city,” matud pa sa mayor

Kini ang hinungdan nga gipanghingusgan niini ang programa sa nutrition ug   ang kahimtang sa panglawas sa mga kabataan ug sa mga inahan nga nagsabak pinaagi sa paghatag og mga bitamina niini.

Ang kagamhanang lokal sa dakbayan sa Lapulapu migahin og usa ka milyon ka pesos alang sa pag-atiman sa maayong panglawas   sa kabataan ug usa ka milyon ka pesos sa feeding program matag tuig   alang sa kabataan.

Bag-o lang usab nga naaprobahan ang   P6.5 milyones nga gahin alang sa katukoran sa Home Care Centers nga magbuwag sa mga babaye ug lalaking biktima sa inhustisya o (conflict with the law) ug mga biniyaan sa ilang mga ginikanan.

Lakip ang mga bata nga adunay mga deperensiya sa panglawas gihatagan usab og gahin P10 milyones alang sa ilang mga pasilidad ug kagamitan sa gitukod niining mga   sentro sa dakbayan sa Lapulapu aron mahimong   labing nindot nga centro sa mga disabled ang dakbayan sa Lapulapu.

Labaw sa tanan giawhag ni Radaza ang mga kabataan sa pagtuon og maayo aron maila ang dakbayan sa Lapulapu nga mas lantip og mga salabotan   nga mga tinun-an niini itandi sa ubang lugar sa nasud.

Gihatagan usab og pagtagad ni Mayor Radaza ang 73 ka mga day care centers sa dakbayan sa Lapulapu diin ang mga benepisyo sa nasudnong kagamhanan gihatag usab kini ngadto sa kabataan ug sa mga magtutudlo niini.

Ang SOCA ni Mayor Radaza miani og mga pagdayeg sa mga tinun-an ug naglaom kini nga matuman ang tanang mga gipanaad sa mayor ilabi na sa sunod nga henerasyon alang sa maayong reporma sa edukasyon. (BANATNEWS)