Rama mura'g nagkomedya - young

CEBU, Philippines - Gihulagway ni Bise Mayor Joy Augustus Young nga murag nagkomedya si Mayor Michael Rama sa giduso nga budget proposal niini alang sa 2012.

Gikan sa P4.45-billion nga budget karong tuiga, mosaka ngadto sa P11.8 billion ang gisugyot ni Rama nga budget sa sunod tuig ug mao kini ang   labing dako nga gahin sa dakbayan sa tibuok kasaysayan niini.

Nagkanayon si Young nga nahibulong siya pag-ayo kung giunsa kini paghuna-huna ni Rama nga kapila naman pil-on ang budget karong tuiga alang sunod tuig.

“Murag masukamod na siya sa iyang gibuhat, kay basin moingon na pud na siya nga wala namo aprobahi,” matud pa ni Young.

Hinuon mag-agi pa kini og taas nga deliberasyon sa konseho ang gimandar nga budget sa mayor.

“Kung mo-promise ,atong seguroon nga mabuhat gyud na nato, kay luoy man sad kaayo ang mga tawo nga atong saaran,” matud pa ni Young.

Samtang si City Administrator Jose Marie Poblete misaysay nga daghan og proyekto nga gihan-ay ang mayor   sa sunod tuig.

Hinuon nagmalaumon si Poblete nga daghan pa og kolektahonon ang siyudad gikan sa mga departamento nga nanghipos og buhis   sama sa Division for the Welfare of the Urban Poor, City Traffic Operations Management, City Resource Management and Development Center ug Cebu City Medical Center.

Pipila lang sa giandam nga proyekto sa mayor ang P500 million alang sa drainage system sa siyudad, mga bag-ong sakyanan alang sa mga kapitan sa barangay ug uban pa. (WC) (BANATNEWS)