'Lider' sa gang gipatay

CEBU, Philippines - Patay ang usa ka batan-ong lalaki nga giingong lider sa usa ka gang human gipusil sa usa sa upat ka mga batan-ong sakop sa karibal nga gang nga mibabag sa agianan sa biktima sa miaging alas-9 pasado sa gabii diha sa Kingswood Subdivision sa barangay Lipata sa lungsod sa Minglanilla.

Ang biktima giila sa kapulisan nga mao si Edwin Alicaya Villondo, 18, nga nagpuyo sa Lower Lipata sa naasoy’ng lungsod.Wala na maabti sa mirespondeng mga polis ang mga kriminal.

Apan kagahapon sa buntag nadakpan sa follow-up operation sa kapulisan nga gipangulohan ni SPO3 Joel Nebrija ang tulo sa upat ka mga suspek diha sa ilang tagsa-tagsa ka panimay. Ang nangadakpan mao sila si Jerry Deiparine, 20, taga sitio Pinggan sa barangay Pakigne; Charlie Sacopaso, 20; taga sitio Pitogo sa barangay Tubod ug Angelo Morilla Unban, 18, taga Pakigne ug ang pabiling gipangita nga ikaupat mao ang ginganlan og Niño Tapac.

Matud pa sa kapulisan nga si Sacopaso maoy gitumbok nga mipusil sa biktima.Wala na usab makuha sa kapulisan ang armas nga gigamit sa pagpamusil.

Ang biktima nga nakaangkon og samad pinusilan sa bukton apan milapos ang bala sa walang kilid niini gidala sa iyang maguwang sa South General Hospital apan paglabay sa pipila ka minutos nakabsan kini sa iyang kinabuhi.

Si PO2 Wendyl Arañas sa Minglanilla Police Station nga gikahinabi sa Banat News nagkanayon nga subay sa pasiunang imbestigasyon sa iyang mga kauban didto sa crime scene nag-inusarang naglakaw ang biktima dihang gibabagan sa agianan sa mga gikatahapan.

Sumala pa ni Arañas gipusil makadaghang higayon si Villondo apan usa ra ka bala ang miigo ngadto kaniya ug human niini naglumbaanay og panagan ang grupo.

Gitutukan sa kapulisan sa imbestigasyon ang panagbangi sa gang maoy posibleng motibo sa maong hitabo. Apan ilang pasakaan ang upat og tukmang kaso. (BANATNEWS)