PNP ug ang media gipahimangnoan

CEBU, Philippines - Ang kadagkuan sa Department of Social Welfare and Development (DSWD) mihangyo sa mga imbestigador ug bisan na sa mga sakop sa media nga dili pugson ang 14-anyos pagsaysay sa nahitabong pagmasaker sa pamilya niini sa ilaha rang amahan.

Si Jaybee Binghay sa DSWD-7 mibutyag nga angayan unang hatagan og higayon ang 14-anyos nga magbangutan sa nahitabo sa iyang pamilya.

Namatay sa maong masaker ang inahan sa bata ingon man iyang tulo ka isguon, ug ang suspek nga ilang padre de pamilya. Naapil sad sa pagpatay ilang katabang.

“Let’s give the child the opportunity to grieved also,” pasabot pa ni Binghay sa report sa Balitang Bisdak kagahapon.

Ang asawa ni Board member Julian Daan nga si Yolly Daan ang silingan sa biktima ug maoy unang gidangpan sa 14-anyos mihulagway nga anaa pa sa ‘state of shock’ ang bata ug naglisod pa kini pagdawat sa nahitabo sa iyang pamilya.

Matud pa ni Felipa Salona, city social development worker sa Talisay nga gipaubos na sa stress debriefing ang 14-anyos ug mirekomendar nga kinahanglang ipaubos kini og laing trauma session.

Samtang si Bise Gob. Agnes Magpale sa pakighinabi sa Banat News miingon nga ilang tan-awon kun kinahanglang tabangan og special child psychologist ang bata aron daling mawala sa huna-huna niini ang trauma.

Matud pa ni PO2 Mike Espina, Talisay City Police, duha ka anggulo ang gituohan nilang hinungdan nga gimasaker ni Emmanuel ang pamilya, kini ang kakuwang na sa pagtagad kaniya sa iyang pamilya ug ang ikaduha, mao ang nervous breakdown nga nasinati niini kaniadto. (BANATNEWS)