Rama ug kauban libre sa Spa

CEBU, Philippines - Giaprobahan na sa konseho sa siyudad sa Sugbo ang resolusyon nga magtugot sa pagpirma ni Mayor Michael Rama og kontrata sa Cebu Holiday Spa alang sa usa ka tuig nga merbership fee sa mga konsehal sa maong establisemento nga mokabat sa P360,000.

Ang maong kontrata nagsugod niadtong Mayo ug matapos sa susamang buwan sunod tuig.

Moabot sa 20 ka mga opisyales sa Siyudad sa Sugbo gikan sa mayor, bise mayor ug 18 ka mga konsehal sa amihanan ug habagatang distrito ang gitugotang makapahimus sa serbisyo sa maong spa center.

Matag usa kanila gastohan sa siyudad og P18,000 nga membership fee busa moabot ngadto sa P360,000 ang usa ka tuig nga kontrata.

Ang mga opisyales sa siyudad walay limitihan sa paggamit sa mga kahimanan sa nahisgutang centro nga naglangkob sa   swimming pool, jogging track ug wall climbing facilities.

Mahimo usab silang makagamit sa “sauna shower”, body fat analysis, fitness testing ug uban pa.

Matagaan usab sila og diskuwento sa higayon nga magpa-masahe sila sa maong shop.

Matud pa sa mga hingtungdang konsehal nga gikinahanglan kaayo   nila nga mag-ehersisyo kanunay ilabi na sa mga edaran aron nindot kaayo ang ilang pinsada sa pag-umol og mga plano alang sa kaayohan sa mga molupyo sa dakbayan sa Sugbo.

Gikinahanglan   maatiman pag-ayo sa kagamhanan ang ilang lawas ug pangisip kay mao kini ang labing importante nga bahin    nga gamiton nila sa pagtuman sa ilang katungdanan.

Dili usab bug-at ang maong gasto kay iya man sa mga magbubuhis   ang   gamitong kuwarta nga dili na kinahanglang itibhang ang ilang suweldo sa ilang trabaho sa city hall. Kay katungdanan sa gobyerno    ang paghatag kanila sa panginahanglan aron magpabilin ang ilang kahimsog..   - (BANAT NEWS)