Bohol magsaulog karon

TAGBILARAN CITY, Philippines –– Gisaulog sa kagamhanan sa lalawigan sa Bohol kagahapon ang World Food Day   uban sa tema nga “Food   Prices from Crisis to Stability”.

Samtang ang Fish Conservation Week nga may tema nga “Karagatan Pagyamanin, Isda Paramihin para sa Lahat,” dungan usab nga gisaulog kagahapon apan molungtad kini hangtod sa Oktubre 22, 2011.

Ang Consumaer Welfare Month gisaulog usab sa mga Bolanon   uban sa tema nga “Sa Pagligtas at Abot-kayang Pagkain para sa Lahat”, ug molungtad usab ang kasaulogan hangtod sa Oktubre 31, 2011.

Gitambayayongan kini sa pagpahigayon sa kagamhanang probinsyal sa Bohol pinaagi sa Office of the Provincial Agriculturist (OPA) uban sa Department of Agriculture (DA), Bureau of Fisheries and Aquatic Resources (BFAR) ug sa Department of Trade and Industry (DTI).

Agi’g pagtimaan sa maong mga kasaulogan, adunay hiniusang kalihokan nga gi-andam karong adlawa Oktubre 17, 2011 ang kagamhanan sa Bohol.

Pagabuksan kini sa usa ka motorcade sa may alas 9:00 karong buntag   nga manukad sa Capitol Annex Grounds paingon ngadto sa Island City Mall (ICM), J. A. Clarin Street, Capitol, C.P.G. North Avenue, New Capitol Site, ug mobalik na ngadto sa Capitol Annex Building diin ipahigayon ang programa sa Municipal Fisheries and Aquatic Resources Management Council (MFARMC).

Gihan-ay ang kasadya niining adlawa sa dakbayan sa Tagbilaran diin ang nagkalain-laing   makalingaw nga pasundayag adto ipahigayon sa JJ’s Annex sa Calceta Street.

Didto usab himoa ang Oath Taking sa MFARMC, Symposium on Health and Wellness through Organics and Waste Management diin iladlad usab didto sa palibot ang mga produkto sa kaumahan ug kadagatan.  - BANAT NEWS