Bishop Palma wala makamisa sa Talisay

CEBU, Philippines - Gumikan sa kamatayon sa iyang inahan niadtong Biyernes, ang Arsobispo sa Sugbo Jose Palma wala mahinayon og saulog sa Santos nga Misa kagahapon sa buntag sa ika-175th nga kasaulogan sa kapistahan sa patrona sa dakbayan sa Talisay nga si Santa Teresa de Avila.

Lakip usab ang kanhi Arsobispo Ricardo Cardinal Vidal nga gitahasan ni Palma nga mosaulog sa Misa wala   usab makatunga tungod sa kakulian sa panglawas niini.

Si Arsobispo Christian Vincent Noel maoy misaulog kagahapon sa Santos nga Misa apan si Vidal nagpadala sa iyang wali nga gibasa sa usa sa mga pari nga miapil sa kasaulogan sa Misa. Ang tipik sa wali ni Vidal nag-awhag sa pag-ampo alang sa kalag sa inahan ni Palma nga si Esther.

Niadtong Biyernes sa hapon si Vidal maoy nagpahigayon sa misa sa nahisgutang parokya “panalagsa lang kini mahitabo nga sa usa ka kapistahan kaduha ka higayon ako magbalik-balik sa usa ka parokya”.

Dugang niini nangomediya si Vidal nga nagkanayon “mahadlok ako nga basin makaingon kamo nga ako overstaying na, o ba kaha nagtuo kamo nga nagdoble-doble na ang akong bringhouse hibalo-i nga ako misanong lamang sa hangyo sa arsobispo, gaan akong buot nga mobalik dinhi kay ako nagtuman lang sa hangyo sa akong amahan sa Diocese”.

Ang kanhi Arsobispo nanghinaot nga dili lang unta nga igo lang sa pagkaon ug pag-inom ang pagsaulog sa pista kundili maghiusa unta sa pagsimba ug pag-ampo.

Gawas niini nanghinaot usab si Vidal nga dili lang unta ang kalingawan ang unahon sa katawhan kundili maghatag usab unta kini og pagtagad sa kalihukan sa simbahan.

Kagahapon atol sa Santos nga Misa gipaila usab ang mga bag-ong Hermano ug Hermana Mayores kinsa lakip kanila si Kongresista Eduardo Gullas, Gobernador Gwendolyn Garcia ug ang apo sa Kongresista nga si Sam Sam Gullas.  - BANAT NEWS